ಈ ಗಣ ರಾಜ್ಯೋತ್ಸವದಂದು ಬೆಂಗಳೂರಿನಲ್ಲಿ ಹೂವಿನ ಹಬ್ಬ. ಎಲ್ಲಿ ನೋಡಿದರೂ ಕೋಲು ಹಿಡಿದು ಕಾಲು ಹಾಕುತ್ತಿರುವ ಹಿರಿಯರಿಂದ ಹಿಡಿದು, ಕೈಗೆ ಸಿಕ್ಕದೆ ಕಣ್ಣತಪ್ಪಿಸಿ ಕುಣಿದಾಡುವ ಮಕ್ಕಳು, ಕೈಕೈ ಹಿಡಿದು ಸುತ್ತಲಿನ ಪರಿವೆ ಇಲ್ಲದ ಅಲೆದಾಡುವ ಯುವ ಜನರು, ಕುಲುಕುಲು ನಗುತ್ತಾ ಬಣ್ಣದ ಸಿರೆಯುಟ್ಟು ಚಿಣ್ಣರನ್ನು ಎತ್ತಿಕೊಂಡು ಕಲರವ ಮಾಡುತ್ತಿರುವ ಗೃಹಿಣಿಯರು ಎಲ್ಲರ ನೋಟ ಲಾಲಬಾಗಿನ ಕಡೆಗೆ. ಕೆಂಪು ತೋಟದಲ್ಲಿ ಹೂ ಹಬ್ಬದ ನೂರನೆ ವರ್ಷಾಚರಣೆ. ಅದಕ್ಕಾಗಿ ದೇಶವಿದೇಶದ ಲಕ್ಷಾಂತರ ಹೂಗಳ ಜಮಾವಣೆ, ನೂರಾರು ಬಣ್ಣದ, ಸಾವಿರಾರು ಜಾತಿ ದೇಶವಿದೇಶಗಳ ಪುಷ್ಪ ಮೇಳ. ಬರಿ ಸಂಖ್ಯೆಯಲ್ಲಿ ಮಾತ್ರವಲ್ಲ ಅವುಗಳ ಜೋಡಣೆಯಿಂದಲೂ ಕಲೆಯ ಕಂಪು ಹರಡಿ ಕಣ್ಣಿಗೆ ತಂಪು, ಮನಸಿಗೆ ಇಂಪು ಕೊಡುತ್ತಿರುವ ಸುಮಗಳ ಸುಮಧುರ ಲಾಸ್ಯ ಲಕ್ಷಾಂತರ ನೋಡುಗರ ಕಣ್ಮನ ತಣಿಸುತ್ತಲಿದೆ.
ರಾಷ್ಟ್ರೀಯ ದಿನಗಳಂದು ಲಾಲಬಾಗಿನ ಗಾಜಿನ ಮನೆಯಲ್ಲಿ ಫಲ ಪುಷ್ಪ ಪ್ರದರ್ಶನ ಈಗ ದಶಕ ದಶಕಗಳಿಂದ ಸಾಗಿಬಂದ ಪರಂಪರೆ. ಇಂದಿಗೆ ಬರೋಬ್ಬರಿ ನೂರುವರ್ಷದ ಇತಿಹಾಸ. ದೇಶ ವಿದೇಶ ಪುಷ್ಪಗಳ ಜತೆಗೆ ಅವುಗಳ ಕಲಾತ್ಮಕ ಸೃಜನಶೀಲತೆಯ ಸಂಕೇತ. ಬಹಳ ಸಲ ಯಾವುದೋ ಒಂದು ವಿಷಯದ ಮೇಲೆ, ಅವುಗಳ ಜೋಡಣೆ ಕೇಂದ್ರೀಕೃತವಾಗಿರುವುದು. ಭಾರತೀಯ ಹಬ್ಬಗಳ ಪ್ರದರ್ಶನ ಒಂದು ವರ್ಷವಾದರೆ, ಋತು ವೈಭವದ ಸೌಂದರ್ಯ ಮತ್ತೊಂದು ವರ್ಷ. ಇತ್ತೀಚಿನ ದಿನಗಳಲ್ಲಿ ಅದು ಇತಿಹಾಸ, ಸಾಹಿತ್ಯ, ಸಂಗೀತಗಳ ಸಂಗಮವಾಗಿ ರಸಿಕರ ಮನಸೆಳೆಯುತ್ತದೆ. ಪ್ರತಿವರ್ಷ ಒಂದೊಂದು ವಿಷಯಾಧಾರಿತ ವ್ಯವಸ್ಥೆಯಿಂದ ಪ್ರದರ್ಶನ ಹೆಚ್ಚಿನ ಮೆರಗು...
