ಕೆಂಡಸಂಪಿಗೆಯ ಅತಿಥಿ ಸಂಪಾದಕರು ಇನ್ನೊಂದು ಐಡಿಯಾದ ಜೊತೆ ನಿಮ್ಮ ಮುಂದೆ ಬಂದಿದ್ದಾರೆ. ಸಾಮಾನ್ಯವಾಗಿ ಎಲ್ಲ ಕಡೆ ಬಡ ಓದುಗರ ನಾನಾ ತರಹದ ಪ್ರಶ್ನೆಗಳಿಗೆ ಜಾಣರಾದ ಸಂಪಾದಕರು ಉತ್ತರಿಸುತ್ತಾರೆ. ನೀವು ಕೇಳಿ, ಕೇಳಿನೋಡಿ, ಕಣ್ಣಾಮುಚ್ಚಾಲೆ, ಚೂಟಾಟ ಇತ್ಯಾದಿ ಅಂಕಣಗಳು ಓದುಗರ ತರಲೆ ತರಲೆ ತರಹೇವಾರಿ ಪ್ರಶ್ನೆಗಳಿಗೆ ಉತ್ತರಿಸಿರುವುದು, ಉತ್ತರಿಸುತ್ತಿರುವುದು, ಉತ್ತರಿಸಿ ಸುಸ್ತಾಗಿ ಮಲಗಿರುವುದು ಇತ್ಯಾದಿ ನಮಗೆಲ್ಲ ತಿಳಿದೇ ಇದೆ. ಈ ರೂಡಿಗತ ರಿವಾಜನ್ನು ಉಲ್ಟಾ ಮಾಡಿ ಅಮಾಯಕರಂತೆ ಕಾಣಿಸುವ ಸಂಪಾದಕರು ಕೇಳುವ ತೊದಲು ಪ್ರಶ್ನೆಗಳಿಗೆ ಅತಿಜಾಣರಾದ ಓದುಗರು ಉತ್ತರಿಸುವ ಅಂಕಣವೊಂದನ್ನು ಈವತ್ತಿನಿಂದ ಶುರು ಮಾಡುತ್ತಿದ್ದೇವೆ. ನೀವು ಮಾಡಬೇಕಾದದ್ದು ಇಷ್ಟೆ. ಈ ಕೆಳಗೆ ಕಂಗೊಳಿಸುತ್ತಿರುವ ಸಂಪಾದಕರ ಒಂದು ಸಾಲಿನ ಪ್ರಶ್ನೆಯ ಕೆಳಗೆ ಸುಮ್ಮನೆ ಮಲಗಿರುವ ಪ್ರತಿಕ್ರಿಯೆಯ ಕೊಂಡಿಯನ್ನು ಒತ್ತಿ ನಿಮ್ಮ ಉತ್ತರವನ್ನು ಕಳುಹಿಸಿ. ದಯವಿಟ್ಟು ಉತ್ತರದ ಕೆಳಗೆ ನಿಮ್ಮ ಶುಭನಾಮ ಹಾಗೂ ಆವಾಸ ಸ್ಥಾನವನ್ನೂ ನಮೂದಿಸಿ.
ಈವತ್ತಿನ ಪ್ರಶ್ನೆ:
ಸಲಿಂಗ ಕಾಮಿಗಳ ಕುರಿತು ಪರಲಿಂಗ ಕಾಮಿಗಳಿಗೆ ಯಾಕೆ ಇಷ್ಟೊಂದು ತಲೆಬಿಸಿ ಮಾರಾಯರೇ?
|
