ವರ್ಷದ  ಹಿಂದೆ ಶುರು ಆದ ರಿಸೆಷನ್ನಿಂದ ಯಾವಾಗ ಹೇಗೆ ಹೊರ ಬಂದೇವು ಎನ್ನುವ ಬ್ರಿಟನ್ನಿನ ಸಮಸ್ಯೆ ಮತ್ತು ಚರ್ಚೆ ಇನ್ನೂ ಮುಗಿದೇ ಇಲ್ಲ .

ತಮ್ಮ ಆರ್ಥಿಕ ವ್ಯವಸ್ಥೆ ಹೊರಗಿನಿಂದ ಥಳಥಳಿಸಿದರೂ ಒಳಗಿನಿಂದ ಎಷ್ಟು ದುರ್ಬಲ ಎಂದು ಜನರು ಮನಗಂಡಿದ್ದಾರೆ. ಕೆಲಸ ಕಳೆದುಕೊಂಡ ಲಕ್ಷಾಂತರ ಜನರು,ಇನ್ನೊಂದು ಕಡೆ ತಮ್ಮ ಕೆಲಸವನ್ನು ಕಸಿದುಕೊಳ್ಳುತ್ತಿರುವ ಹೊರಗುತ್ತಿಗೆ ಮತ್ತು ಸುತ್ತಲಿನ ಯೂರೋಪಿನವರ ಮತ್ತು ಸ್ವಲ್ಪ ದೂರದ ಏಷಿಯಾದವರ ವಲಸೆಗಳ ಬಗ್ಗೆ ಬಿಸಿ ಬಿಸಿ ಚರ್ಚೆ ನಡೆಯುತ್ತಿರುವಾಗಲೇ ಹಿಮ ಸುರಿದದ್ದು; ಹಗಲು ಹೊತ್ತಿನಲ್ಲೂ ನೆಲಮಟ್ಟದ ಉಷ್ಣತೆ ನೀರಿನ ಘನೀಭವಿಸುವ ಉಷ್ಣತೆಗಿಂತ ಕೆಳಗೆ ಇರುವುದರಿಂದ ಸುರಿದ ಹಿಮ ಕರಗದೆ ನಿಂತದ್ದು; ವಾರದಿಂದ ಇಡೀ ಬ್ರಿಟನ್ ಹಿಮದ ಮುಸುಕು ಹೊದ್ದು ಒಳಗೇ ಗುದ್ದಾಡುತ್ತಿದೆ. ಮಾಡಿನ ಮೇಲೆ ಮನೆ ಮಾಡಿ ಕುಳಿತಿರುವ ಹಿಮದ ಪದರಗಳು ಇಳಿಯುವ ಸೂಚನೆ ಕಂಡು ಬರುತ್ತಿಲ್ಲ.

ಊರುಗಳ ಪ್ರಮುಖ ರಸ್ತೆಗಳನ್ನು ಸಂಚಾರಯೋಗ್ಯವಾಗಿಡಲು ಸ್ಥಳೀಯ ಸರಕಾರಗಳು ಹೋರಾಡುತ್ತಿವೆ. ಉಳಿದೆಲ್ಲ ಚಿಕ್ಕ ಪುಟ್ಟ ಮಾರ್ಗಗಳು ಅಡ್ಡ ರಸ್ತೆಗಳು ಹಿಮ ತುಂಬಿಕೊಂಡು ತಮ್ಮನ್ನು ಕೇಳುವವರೇ ಇಲ್ಲ ಎಂದು ಕುದಿಯುತ್ತಿವೆ. ಹಿಮ ಬೀಳಬಹುದೆಂಬ ಮುನ್ಸೂಚನೆ ಸಿಕ್ಕಿದ ಕೂಡಲೇ ರಸ್ತೆಗಳಿಗೆ ಹರಳು ಉಪ್ಪು (grit salt) ಹಾಕುವುದೊಂದು ಪದ್ಧತಿ. ಇದು ಹಿಮ ಕರಗಲು ಸಹಾಯ ಮಾಡುತ್ತದೆ.

ಈ ಸಲ ವ್ಯಾಪಕವಾಗಿ ಸುರಿದ ಹಿಮದಿಂದ ಉಪ್ಪಿಗೆ ಬೇಡಿಕೆ ಹೆಚ್ಚಿ ಅಂಗಡಿಗಳಲ್ಲಿ ಅಡುಗೆ ಉಪ್ಪು ಸಹ ಸಿಗುತ್ತಿಲ್ಲ! ಪುರಸಭೆಗಳು ತಮ್ಮ ತಮ್ಮ ಕ್ಷೇತ್ರಗಳಿಗೋಸ್ಕರ ಉಪ್ಪು ಸಂಗ್ರಹದಲ್ಲಿ ತೊಡಗಿದ್ದರೆ, ಜನಸಾಮಾನ್ಯರು ತಮ್ಮ ತಮ್ಮ ಆಸುಪಾಸುಗಳನ್ನು ಚೊಕ್ಕವಾಗಿಡಲು ಯದ್ವಾ ತದ್ವಾ ಉಪ್ಪು ಖರೀದಿಸಿ ಅಂಗಳಕ್ಕೆ ರಸ್ತೆಗೆ ಚೆಲ್ಲುತ್ತಿದ್ದಾರೆ. ಮೊನ್ನೆ ಮೊನ್ನೆಯ ತನಕವೂ ಪೆಟ್ರೋಲ್ ಇತ್ಯಾದಿ ಇಂಧನಗಳನ್ನು ಮಿತವಾಗಿ ಬಳಸಿ ಎನ್ನುತ್ತಿದ್ದ ಸರಕಾರ ಮತ್ತು ಅದರ ಪಂಡಿತ ವರ್ಗ ದಯವಿಟ್ಟು ಉಪ್ಪಿನ ಬಳಕೆ ಕಡಿಮೆ ಮಾಡಿ ಎನ್ನುತ್ತಿದೆ. ಉಗ್ರಾಣದಿಂದ ಕಳ್ಳರು ಉಪ್ಪಿನ ಮೂಟೆಗಳನ್ನು ಕಳ್ಳತನ ಮಾಡಿ ಸಮಯಪ್ರಜ್ಞೆಯಿಂದ ವರ್ತಿಸುತ್ತಿದ್ದಾರೆ. ಪೊಲೀಸರಿಗೆ ವಾರದಿಂದ ಬರುತ್ತಿರುವ ದೂರುಗಳಲ್ಲಿ ಹೆಚ್ಚಿನವು ಉಪ್ಪಿನ ಕಳ್ಳತನದ ಬಗ್ಗೆಯೇ ಆಗಿವೆ.

ದೇಶದ ಉದ್ದಗಲಕ್ಕೆ ಸಾವಿರಾರು ಶಾಲೆ ಕಾಲೇಜುಗಳಿಗೆ ಮಂಜು ಕರಗುವವರೆಗೂ ರಜೆ ಘೋಷಿಸಲಾಗಿದೆ. ಮಕ್ಕಳು ಸಿಕ್ಕಿದ ಅವಕಾಶದಲ್ಲಿ  ಹೊರಗೆ ಬಂದು ಯಥೇಚ್ಚವಾಗಿ ಹಿಮದ ಚೆಂಡಾಟ ಆಡುತ್ತಿದ್ದಾರೆ, ಹಿಮ ಮನುಷ್ಯನ ಗೊಂಬೆ ನಿರ್ಮಿಸುತ್ತಿದ್ದಾರೆ. ಮಂಜುಗಡ್ಡೆ ಎಂದರೆ ರೆಫ್ರಿಜಿರೇಟರಿನಲ್ಲಿ ನೋಡಿದ ಅನುಭವವೇ ಹೆಚ್ಚಿರುವ ನನ್ನಂತಹವರು ಕ್ಯಾಮೆರ ಹಿಡಿಕೊಂಡು ಬೀದಿ ಬೀದಿ ಸುತ್ತಿ ಫೋಟೋ ತೆಗೆಯುತ್ತಿದ್ದಾರೆ. ಮಂತ್ರ ತಂತ್ರಗಳ ಬಲ ಇಲ್ಲದೆ ಸರೋವರಗಳ ಮೇಲೆ ಜನರು ಓಡಾಡುತ್ತಿದ್ದಾರೆ. ಹಾಗೆ ಓಡಾಡಿದವರಲ್ಲಿ ಲೆಸ್ಟರ್ ನಗರದ ಕೆರೆಯೊಂದರ ಘನೀಭವಿಸಿದ ಮೇಲ್ಪದರ ಬಿರುಕು ಬಿಟ್ಟು ಸಹೋದರರಿಬ್ಬರು ಮುಳುಗಿ ಮಡಿದಿದ್ದಾರೆ. ಬಸ್ಸು ರೈಲುಗಳ ಸಂಚಾರ ದಾಕ್ಷಿಣ್ಯ ಇಲ್ಲದೆ ಸ್ಥಗಿತಗೊಂಡಿವೆ, ದೂರ ತೀರದ ವಿಮಾನಗಳು ಅತಿ ಜಾಗರೂಕತೆಯಲ್ಲಿ ಹತ್ತಿ ಇಳಿಯುತ್ತಿವೆ. ಸಾಗಾಣಿಕೆ  ವ್ಯವಸ್ಥೆ  ಇಲ್ಲದ ಕಾರಣ ಸಾವಿರಗಟ್ಟಲೆ ಲೀಟರು ಹಾಲನ್ನು ಮುಟ್ಟಿಸಬೇಕಾದ ಜಾಗಕ್ಕೆ ಮುಟ್ಟಿಸಲಾಗದೆ ವ್ಯರ್ಥವಾಗಿ ನೆಲಕ್ಕೆ ಚೆಲ್ಲಲಾಗಿದೆ. ಜನಜೀವನ ಸಂಪೂರ್ಣ ಅಸ್ತವ್ಯಸ್ತಗೊಂಡು ತತ್ತರಿಸುತ್ತಿದ್ದರೆ ವನ್ಯಜೀವಿಗಳೂ ಈ ವಿಷಮ ಪರಿಸ್ಥಿತಿಯಲ್ಲಿ ಬಳಲುತ್ತಿವೆ. ಹಿಮ ಕರಗುವುದರೊಳಗೆ ಇಂಗ್ಲೆಂಡಿನ ಕೆಲವು ಅಪೂರ್ವ ವನ್ಯಜೀವಿಗಳು ಕಣ್ಮರೆ ಆಗಬಹುದಂತೆ.

ಮಾತೆತ್ತಿದರೆ ಇತಿಹಾಸದ ಕಂತೆಯನ್ನು ಬಿಡಿಸಿ ಹಾಸುವ ಆಂಗ್ಲರು ೨೦೧೦ನೆಯ ಜನವರಿಯ ಹಿಮಪಾತವನ್ನು ತಮ್ಮ ಚರಿತ್ರೆಯ ಪುಟದೊಳಗೆ  ಗಟ್ಟಿಯಾಗಿ ಸೇರಿಸಿಕೊಂಡಿದ್ದಾರೆ. ೧೯೬೩ರ ಚಳಿಗಾಲದ ನಂತರದ ಭೀಕರ ಚಳಿಗಾಲ ‘ಇದೇ ಸೈ' ಎಂದು  ಅನುಭವಸ್ಥರು ಹಿರಿಯರು ತಮ್ಮ ತಲೆಕೂದಲೊಳಗೆ ಬೆರಳಾಡಿಸುತ್ತ ಅನುಭವವನ್ನು ಕದಡಿ ನೆನಪಿಸಿಕೊಳ್ಳುತ್ತಿದ್ದಾರೆ.

ರಿಸೆಷನ್, ವಲಸೆ, ಹೊರಗುತ್ತಿಗೆ ಇತ್ಯಾದಿ ಇತ್ಯಾದಿಗಳು ಮತ್ತೆ ಮತ್ತೆ ಹೊಸ ರೂಪ-ವೇಷದಲ್ಲಿ ಎದುರಾಗುವುದನ್ನು ನೆನೆಯುತ್ತ ಹಿಮಪಾತದ ಮೇಲೆ ಓಡಾಡುವುದು ಮೆಲ್ಲಗೆ ಶುರು ಆಗಿದೆ. ಹೊಸ ಪ್ರಪಂಚಕ್ಕೆ ಪರಿಚಿತವಾದ ಮಕ್ಕಳ ಕಲಿಕೆಯ ನಡಿಗೆಯಂತೆ ಹಿಮದ ರಾಶಿಯ ಮೇಲೆ ಎಲ್ಲರ ನಡಿಗೆ. ಆಗಷ್ಟೇ ಬರೆಯಲು ಕಲಿತ ಮಗುವೊಂದು ಸ್ಲೇಟಿನಲ್ಲಿ ಬರೆದ- ಯಾವ ಕ್ಷಣದಲ್ಲೂ ಅಳಿಸಿ ಹೋಗುವ ಅಳುಕಿನಲ್ಲೇ ಮೂಡುವ ವಿವಿದ ಆಕಾರದ ಅಕ್ಷರಗಳಂತೆ, ಹಿಮದ ರಾಶಿಯ ಮೇಲೆ  ಗುರುತುಗಳು ಕಾಣಿಸುತ್ತಿವೆ; ಅಜ್ಜ ಅಜ್ಜಿಯರ ಅಲುಗಾಡುವ ಹೆಜ್ಜೆಗಳು ಮೊಮ್ಮಕ್ಕಳ ಮರಿಮಕ್ಕಳ ತುಂಟ ನಡಿಗೆಗಳು, ಎಲ್ಲ ಸ್ತರದ ಎಲ್ಲ ತರದ ಮನುಷ್ಯರ ಹೆಜ್ಜೆಗಳು ಹಿಮದ ರಾಶಿಯ ಮೇಲೆ ಸ್ಪಷ್ಟವಾಗಿ ಮೂಡಿವೆ. ಒಂದೊಂದು ಹೆಜ್ಜೆಯ ಗುರುತು ಒಂದೊಂದು ದಿಕ್ಕು ಹಿಡಿದು ನಡೆದಂತೆ ಇದ್ದರೂ ಎಲ್ಲ ಹೆಜ್ಜೆ ಗುರುತುಗಳು ಒಬ್ಬರದೇ ಅನಿಸುವಷ್ಟು ಏಕತಾನತೆ ಇದೆ; ಒಬ್ಬರ ಹೆಜ್ಜೆಯ ಗುರುತೇ ಬೇರೆ ಬೇರೆ ಜಾಡಿನಲ್ಲಿ ಹೊಗಿರಲಿಕ್ಕೆ ಇರಬಹುದಾದ ಅನಿವಾರ್ಯತೆಯೂ ಇದೆ.

(ಚಿತ್ರಗಳು: ಯೋಗೇಂದ್ರ)