ಗಾಂಧಿ ಕನ್ನಡಕದೊಳಗಣ ಬಿಂಬಗಳು
ಈ ಗಾಂಧಿ ಬಜಾರಿನವರ ಕನಸುಗಳೇ ಹೀಗೆ
ಯಾವ ಕಡಲಿನೊಡಲನು ಸೇರದ
ಬಿಸಿಗಾಳಿಯೆದುರು ಈಜಲಾಗದ
ನದಿಗಳ ಹಾಗೆ
ಗಾಳಿಧೂಳು ಹೊಗೆಯನುಂಡು
ಕೈ ತೊಳೆಯುವುದು ಕಣ್ಣೀರಲಿ;
ಚಿಂದಿ ಆಯುವ ಬೆರಳುಗಳಿಗೆ ಜೋತುಬಿದ್ದ
ಗಗನಮನೆ ಮಂದಿಯ ಕಸದ ತೊಟ್ಟಿಲು;
ಅಕ್ರಮ ಸಂತಾನಕ್ಕೆ
ಸೊಳ್ಳೆಗಳ ಲಾಲಿಹಾಡು !
ಸದಾ ಸೂತಕ ಸ್ವರದ ಜಾಡು
ವರಾಹವನು ಹಂದಿಯೆಂದು
ಶ್ವಾನವನು ನಾಯಿಯೆಂದು
ನಾಮಕರಿಸಿದ ನಾಲಿಗೆಗೆ
ಚರಂಡಿ ನದಿಗಳ ಪುಣ್ಯಸ್ನಾನ
ಕರುಳಿಗೆ ಕೊಳೆತ ಕಸದ ಅಭಿಷೇಕ
ಮಹಾನಗರದ ಮೂತ್ರಪಿಂಡ
ಗರ್ಭಜಲದೊಳು
ಮುಳುಮುಳುಗುವ ಪೌರಕಾರ್ಮಿಕರ ಉಸಿರು,
ತೇಲುತಿಹ ಹೆಣದ ಬಟ್ಟೆ
ಅರ್ಧತುಂಬಿದ ತಿಥಿಯೂಟದ ತಟ್ಟೆ
ಈಗ
ದೇಶದ ಆತ್ಮವೊಂದು
ಸಾರ್ವಜನಿಕ ಸ್ಮಶಾನವಾಗಿದೆ
ಕ್ಷಮಿಸಿ
ಗಾಂಧಿ ಕನ್ನಡಕದಲ್ಲಿ
‘ಎಲ್ಲವೂ ಶುಚಿಯಾಗಿಯೇ ಇದೆ’
ಆತ್ಮದ ಕಲೆ, ಬಿಳಿಕಾಲರಿನವರ ಕೊಲೆಗಳ
ಹೊರತು…!